|
ههرمان
|
|
پێنج شەممە, 03 تشرینی دووەم 2011 10:24 |
|
بڕیارە ڕۆژی 6ی ئەم مانگە پاڵەوانیەتیی جیهان لە یاریی لەشجوانی لە وڵاتی هیندستان بە بەشداریی زیاتر لە 80 وڵات ئەنجام بدرێت، لەوانەش هەڵبژاردەی عێراق بە كۆمەڵێك یاریزان بەشداریی دەكات، لەوانەش 3 یاریزان و پاڵەوانی ناسراوی كورد بەشدار دەبن، كە پێكهاتوون لە (سەردار ئیسماعیل، نزار ئەحمەد و نەجمەددین عەبدوڵلا). كە لە پێكهاتەی هەڵبژاردەی عێراقدان بۆ پاڵەوانیەتییەكە.
هەرسێ یاریزانی كوردیش ماوەیەكی زۆرە لە مەشق و ڕاهێنانێكی چڕوپڕدان تا بتوانن ئەنجامێكی باش بەدەست بێنن و لە هەوڵی ئەوەدا دەبن بتوانن میدالیای زێڕ بەدەست بهێنن.
لە بارەی بەشداریكردنیان لە پاڵەوانیەتییەكە پاڵەوانی ناسراو سەردار ئیسماعیل بۆ هەولێر وەرزش گوتی: “بە خۆشحاڵییەوە و بە ورەیەكی بەرزەوە بەشدار دەبین، من چوارەم جارە بەشداریی لە پاڵەوانیەتیی جیهان دەكەم و نزار ئەحمەدیش یەكەم جارە و نەجمەددین عەبدوڵڵاش بۆ جاری دووەمە بەشداریی دەكات، پێشبینیش دەكەم پاڵەوانیەتیی ئەمجارە زۆر بەهێز بێت و ڕكابەری سەخت لە نێوانیان یاریزانەكانداهەبێت”.
سەردار ئیسماعیل گوتیشی: “ئێمە هەر سێ یاریزان باش ئامادەین بۆ ئەم پاڵەوانیەتییە و هەوڵ دەدەین میدالیای زێڕ بەدەست بهێنین”.
سەردار ئاشكراشی كرد: “یەكیەتیی لەشجوانیی عێراق و كوردستانیش نەیانتوانیوە هیچ هاوكارییەكی ئەوتۆمان بكەن تەنانەت نەیانتوانیوە ڤیزای سەفەرەكەشمان بۆ دابین بكەن و لەسەر ئەركی خۆمان پارەی فڕۆكەشمان دابین كردووە، نە لیژنەی ئۆڵمپی و نە وەزارەتی ڕۆشنبیری و لاوانیش هاوكارییان نەكردین، ئەو هاوكارییانەی بەدەستیشمان گەیشتووە لە لایەن كەسانی تایبەتەوە بووە، لەوانە بەڕێزان فازڵ میرانی و ڕەوان بارزانی، سوپاسیان دەكەین”.
ئەو یاریزانانە لەوە نیگەرانن كە جیاوازی دەكرێ لە گرینگدانی لایەنە بەرپرسەكان بۆ یارییە وەرزشییەكان و كەمتر گرنگی بە یارییە تاكەكان دەدەن.
ئەو سێ یاریزانە كوردە بە هیوای ئەوەن بتوانن لە پاڵەوانیەیتی جیهاندا ئاستێكی بەرز پێشكەش بكەن و میدالیای زێر بەدەست بهێنن و ناوی كورد و ئاڵای كوردستان بەرز بكەنەوە، لەگەڵ ئەوەشدا هیوادارن لایەنە بەرپرسەكان بایەخی زیاتریان پێ بدەن، بە تایبەتی لە كاتی ئێستە، كە وادەی پاڵەوانیەتییەكە نزیك بووەتەوە.
|
