شێخ ئەحمەدێ نەمر سالا 1896 ێ ل گوندێ بارزان و ل مالباتەكا ئولی و ناڤدار هاتە سەر دنیایێ، هێشتا تەمەنێ وی (7) سال بوو كو بابێ وی شێخ محةمەد چویە بەر دلوڤانیا خودێ و برایێ وی شەهیدێ نەمر شێخ عەبدلسەلام بارزانی ل جیێ بابێ وان روینشت و درێژە ب خەباتا خویا مروڤی و ئولی و شوڕەشگێری دا و دسەر دەمێ شێخ عەبدلسەلامێ نەمردا تەڤگەرا بارزان گەلەك ب هێز كەفت و چاكسازیێت جڤاكی وەراركر و گەلەك رویدانێت مەزن چێبوون.سالا 1914 ێ كو شێخ عەبدلسەلام بارزانی ژلایێ توركێت عوسمانیڤە هاتە دەستە سەركردن و شەهید كرن، شێخ ئەحمەدێ بارزانی ل شوینا وی روینشت و درێژی ب رێبازا پیروزا بارزان دا، وی دەمی ژییێ وی(18)سال بوو.

سەربارێ كو ل رویێ ژییێ خوڤە گەنج بوو لێ ب حیكمەت و زانین و لێهاتیا خو پێوەستا گەشەی ب هزر و بیر و باوەرا بارزانەتیێ بدەت و تەڤگەرا بارزان گەلەك ب هێزتر ل بەرێ بەرەڤ ئامانجێت بلندێت ئولی،نەتەوی و مروڤی رێنوینی بكەت، هەر ل چارچوڤێ وێ رێبازێدا، ل سالا (1919)ێ دهەوارا (شێخ مەحمودێ حەفید) چو و ل دژی زولم و زورا ئێنگلێزان ڕاپەڕی، لبەر ناڤداریا شێخ عەبدلسەلامێ بارزانی و ئەو ڕولێ بو سەركردایەتیا تەڤگەرا بارزان و بزاڤا رزگاریخوازیا كوردستانێ گێڕای (شێخ عبدالقادرێ نەهری) نامەیەك ب رێیا (شێخ عبدالرحمانێ شرناخی) هنارد بو (شێخ ئەحمەدێ بارزانی) داكو سەركردایەتیا بزاڤا كوردان ب دستڤە بگریت لێ شێخ ئەحمەدی قەبوول نەكر و پێدا گرتن لسەر هندێ كر كو ئەڤ ئەركە ب شێخ عبدولقادری بهێتە ڕاسپاردن،هەر لسەر داخازا وی شێخ ئەحمەدی(مەلا مستەفا بارزانی)برایێ خو دگەل شێخ عبدالرحمان شرناخی هناردە باكورێ كوردستانێ و ل دەڤەرا دوشێ چویە هەڤدیتنا شێخ عبدالقادری و شێخ سەعیدێ پیران، ئەویش ل سالانێت 1917/1919ێ دا بوویە.سەر دەمێ پێشەوایەتیا شێخ ئەحمەدێ بارزانی(خۆدانێ بارزان)سەر دەمەكێ پڕشنگدارە ددیروكا پڕ سەروەریا گەلێت كوردستانێ ب گشتی و تەڤگەرا بارزان ب تایبەتی،شێوازێ بڕێڤە برنێ،دادپەروەری،یەكسانی،لێبوردەیی، سەرشوڕنەكرن بو داگیركەران و دۆژمنێت گەلێ كورد،تەسلیم نەبوون،ئیرادەیەكا پولائین،راستی و درستی،رەوشت بەرزی و پێكڤە ژیانا ئولی و... هتد.هەر هەمی ئەو بنەما و تێگەه بوون كو ل سەر دەمێ ویدا گەشە پێ هاتە دان و ب ئاوایەكێ ئاشكرا كاریگەری كرە سەر هەست و دەرونێ تاكێ كورد و بویە بنگەه و بنیاتێ ئاڤا بوونا هزرا مروڤی دناڤ گەلێت كوردستانێدا.

- سالا 1919 ێ دەمێ كو شێخ مەحمودێ حەفید ل دژی داگیركەران شورەش كری،خۆدانێ بارزان پشتەڤانی لێكرو نامە بو شێخ و سەروك هوزێت دەڤەرا بادینان هناردن و هاندان كو پشتگیریا شێخ مەحمودی بكەن و هژمارەكا چەكداراش ب سەروكاتیا برایێ خو (مەلامستەفا بارزانی) دهەوارا ویدا هناردن .

- سالا 1920ێ كو گەلێ ئەرمەنی كەفتیە بەر هێرش و پەلامارێت توركان ئەندرانیك پاشای نامەیەك بو شێخ ئەحمەدی هنارد و داخازا هاریكاری و دهەوار چونێ لێكر،خۆدانێ بارزان كو هەلگرێ پەیاما ئاشتیخوازی و مروڤی و پێكڤە ژیانێ بوو و هەردەم پشت و پەنایەكا ئێمن و تەنا بوو بو كەسانێت لێڤەومایی و هەر گاڤ پشتەڤان و بەرگریكار بوو ل مافێت مروڤان و هەمی ڕحم و ڤیان بوو، ئەمردا وولی بەگی كو ب هێزەكا 200 كەسیڤە د هەوارا وان بچیت، ئەو بوو وولی بەگ ب 200 كەسانڤە كو مەلا مستەفا بارزانیش دگەل واندا بوو دهەوارا ئەندرانیك پاشای چون،هەر وەكی كو جەنابێ سەروك بارزانی دپەرتوكا خودا (بارزانی و بزاڤا رزگاریخایا كورد) لاپەرە(24) نڤیسیە و دبێژیت من ل بارزانی نەمر گوهلێبوویە كو دگوت: دەما كو سالا (1920)ێ ئەرمەنی كەفتنە بەر كۆشتارا بێ ڕەحمانە و ئەندرانیك پاشای داخازا هاری كاریێ ل شێخ ئەحمەدی كری، شێخی ئەمردا وولی بەگی كو ب هێزەكا 200كەسی بچیتە هەوارا وان ئەزیش دناف وێ هێزێدا بووم، ئەم د هەوارا ئەرمەنیان چوین و مە هاریكاریا وان كر و دگەڵ وان هەتا سوریا چوین، ئەو خێزانێت كو مە ڕزگاركری خێزانا ئەندرانیك پاشایش دگەڵدا بوو، پاشی ل ڕێیا زاخو ڤەگەڕیاینەڤ بارزان، دوان لێك دانادا دگەڵ سوپایێ تورك مە 14شەهید دان . هەر ل سەردەمێ خودانێ بارزان تەڤگەڕا بارزان روژ ب ڕوژێ گەشە دكر وە ب هێزتر دبوو، لەوا ئینگلێز و حكومەتا بەغدایێ زور باش هەست ب ڤێ چەندێ دكر و وەكی هەڕەشە و مەزنترین مەترسی بوسەر دەسەلاتا خو و زیدەگاڤیێت خو دزانی، لبەر هندێ ب هەمی ئاوایەكێ دەست هاڤێتە پیلان و نەخشەیان بو لناڤبرنا ڤێ تەڤگەرێ، جار هوزێت دەور و بەرێت بارزانیان هان ددان بو نەهێلانا ڤێ تەڤگەرێ و جاریش هەبوو ڕاستەوخو و ب دۆقولی پێكڤە پەلامارا ڤێ تەڤگەرێ ددا . لێ هەر جار لبەر سروشتێ وان تێگەه و بنەمایێت كو تەڤگەرا بارزان و ڕێبازا مروڤیا ڤێ تەڤگەرێ لسەر دامەزریای، ئەو نەخشە و پیلانە پووچەل دبوون : سالا(1931)ێ عەقید برقی بەگی ب پیلانەكا زورا ورد ول پێش داڕێتی هەول داكو دەست ب سەر بارزاندا بگریت، لێ وێ جارێ تووشی شكەستنەكا مەزن بوو و ب سەر شوڕێڤە ڤەگەریا.

- ل مانگا ئازارا 1932 دیسان هێرشەكا مەزن و پەڕە كرە سەر بارزان لێ ل شەڕێ ب ناڤ و بانگێ (دولا ڤاژیێ) دا توشی شەرموزاری وشكەستن و زیانەكا زور بوون، ئەو بوو شورەشا یەكەم یا بارزان دەست پێبوو، پشتی كو گوشار و پالە پەستویا هێزێت رژێما عێراقێ و ئینگلێزان بو سەر تەڤگەرا بارزان زێدە بوون ب ناچاری پەنا بردە بەر توركیا .

- ل بهارا سالا1933 ێ حكومەتا توركیا، شێخ ئەحمەدێ بارزانی ڕادەستی حكومەتا عێراقێ كر. ل مانگا ئاب 1933 ێ حكومەتێ شێخ ئەحمەد ئیناڤ بارزان.

لێ زور پێنەچو دیسان حكومەتێ هناردەڤ خۆدانی، ئەو بوو شێخ ئەحمەد چوو مویسل و پشتی چەند روژەكا باوەر پێكریەك هناردە دویڤ مەلا مستەفای، وە پشتی ویش حكومەتێ هناردە محمدصدیق، بابو و بچوكێت شێخ عبدالسلامی و هەمی مالباتێت وان ئێدی قوناغا دەستە سەركرنێ و دویر ئێخستنێ دەست پێكر.ل دویماهیا سالا (1936)ێ برنە بەغدایێ، هنگی شێخ مەحمودیش هاتبویە دویر كرن بو بەغدا، ئەڤە دەرفەتەك بوو بو هاتوچونا شێخ ئەحمەدی وشێخ محمودی، حكومەتێ گومان پەیدابوو لسەر ڤان هەڤدیتنان لبەر هندێ بارزانی ڤەگواستن بو ناسریە ل (باشورێ عێراقێ) . سالا(1939) ێ حكومەتێ شێخ ئەحمەد و مالباتێت وان بو دەمەكێ كۆرت ڤەگواستە ئالتون كۆپری وكفری، پاشی ئینانە سلێمانیێ . ل سلێمانێی پەیوەندیێت خو دگەل كومەلە و رێكخراوێت كوردی ڕێك ئێخست ب تایبەتی كومەلە یا هیوا و تەخ كورد پەروەر ل وێ دەڤەرێ. سالا1943 ێ مەلا مستەڤا بارزانی دگەل دو كەسێت دیكە بناڤێت : عبداللە ئاكرەیی و سلێمانە سور، سلێمانی ب جه هێلا و ب ڕێیا ئیرانێ ڤەگەریا دەڤەرا بارزان، دگەل ڤەگەریانێ دەست هاڤێتەڤ ڕێكخستنا هَێزان و هەمی پولیسخانە و بنگەه و بارەگایێت سەربازی گرتن و دەڤەر ئازاد كر و حكومەت ناچار بوو داخازا دن و ستاندنان بكەت، بارزانی ئێكەم مەرج بو دان و ستاندنا ڤەگەڕیانا شێخ ئەحمەدی وتەڤایا دویر ئێخستیان بو دەڤەرا بارزان دەستنیشان كر، ل ئەنجامدا رێكەفتا(12\2\1944) ێ حكومەتێ رێ داكو شێخ ئەحمەد ومالباتێت بارزانی ڤەگەڕێنەڤ بارزان، ئەول گوندێ سرێشمە بوویە مێڤانێ (ئەحمەد شاباز) و ل وێرێ خزمەتەكا باشا وان هاتەكرن، هێزەكا بارزانیان ب سەرۆكاتیا ئەسعەد خوشەڤی گەهشتە سرێشمە بو پێشوازیكرن ل وان و پاراستنا ڕێكێ، بارزانی نەمریش ل گوندێ شانەدەر چاڤەرێی وان بوو . بارزانی دگوت : ئەو روژە خوشترین روژا من بوو. پشتی ڤەگەریانا شێخ ئەحمەدی، سەروك هوزێت هەمی دەڤەران هاتنە بارزان بو خێر هاتن پێكرن وكەیفخوشیێ و دوبارە كرنەڤا هاریكاریێ دگەل بارزان .

سالا (1945) ێ حكومەتێ ب پالپشتی و هاریكاری و هاندانا ئینگلێزان بڕیاردا هێرش بكەنە سەر بارزان وڤێ دەڤەرێ داگیر بكەن، ئەو بوو شورەشا دووەما بارزان دەست پێبوو، بارزانی چو بو وارێ هورێ بو دیتنا شێخ ئەحمەدێ بارزانی و وەرگرتنا فەرمانێت وی.

ئەو بوو فەرمانا بەرگریێ و جورێ ئارایشا سەربازی هاتە وەرگرتن و چەندین داستانێت پڕ قارەمانەتی و ناڤدار هاتنە تومار كرن . ل وانا شەڕێ مەیدان موریكێ بوو كو زیانەكا ئێكجار زورڤ هێزێت داگیركەر كەفت . مخابن ڤێ جارێش هندەك هوزێت كورد ژلایێ حكومەتێ و ئینگلێزا نڤە هاتنە هاندان بو دژایەتی كرنا شوڕەشێ و ئەڤ چەندە ش بویە ئەگەرا هندێ كو شوڕەش پێنەدەستێت ئامانجێت خو بدەست بێخیت . ئەو بوو بارزانی پەیوەندی ب لێژنا ئازادیێ ڤە كر و پشتی وەرگرتنا پەسند و رازیبونا شێخ ئەحمەدی (خۆدانێ بارزان) بریاردا بەری دەستپێكرنا بەفر و بارانێ و نەمانا ڕێكا بەرەڤ روژهەلاتێ كوردستانی پاشەكشەی بكەن، لبەر كول وێرێ كاودانەكێ نوو ل بەروكا بزاڤا رزگاریخازیا كوردیدا ڤەببو و بو پاراستنا ڤێ هێزا ئەزمون دیتی كو زوردا هاریكار بیت بو جێگیر بوونا ڤ هەلومەرجێت نوو ل كوردستانا روژهەلات .

بارزانیان پشكداریەكا چالاكانە و بەرگریەكا قارەمانانە و مێرانە ل كومارا كوردستانێ ل مهابادێ كر،لێ لبەر چەندین ئەگەران كومارا كوردستانێ هەلوەشیا و كاودانەكێ زور یێ نەخۆش بو بارزانیان چێبوو،بەلێ دیسان ب رێڤەبەرایەتیا ژیرانە و حەكیمانەیا شێخ ئەحمەدێ بارزانی،ب بێ كو خو تەسلیم بكەن دوبارە كاروانێ خەباتێ بەرەڤ تومار كرنا سەركەفتنەكا دیكە رێنوینی كر،پشتی چەندین هەول و پێكولێت حكومەتێ بو خو ڕادەستكرنا بارزانیان ل ناڤەڕاستا مانگا شۆباتێ نوێنەرێت حكومەتا ئیرانێ(هومایونی و غەفاری)هاتنە نەغەدەی بو دیتنا شێخ ئەحمەدی و مەلا مستەفای،دڤێ دیدارێدا نوێنەرێت ئیرانێ 3 پێشنیار كرن كو ئێكێ هەلبژێرن:1- بارزانی ئێك و پل ئیرانێ ب جه بهێلن،

2/چەكێت خو دابنێن و رازی بن ئێك و پل ڤەگوێزنە هەمەدان.

3/دبەر هەڤ بن بو بەرەنگاربوونا دگەل لەشكرێ ئیرانی.

دبەرسڤا واندا شێخ ئەحمەدی تێگەیشتاندن كو پێشنیارا ئێكێ واتە ب جه هێلانا ئیرانێ یا دجهێ خو دایە،لێ پشتی بژین و نەمانا بەفرێ،چونكی نوكە رێ دگرتینە،پێشنیارا دۆیێ نابیت و ناهێتە كرن،یا سێیەمیش،چەكدارێت مە دەست پێكەرێت شەڕی نابن،بەلێ ئەگەر هێرش هاتە سەر،دێ بەرگریێ ل خو كەن،ئەڤ كومبوونە بێ مفا بو و شەڕ دەست پێبوو،مخابن ڤێ جارێش هندەك ل سەروك هوزێت كورد ڤ پێش دوژمنان كەفتن بو هێرش كرنە سەر هێزێت داكوكیكار ل كومارا كوردستانێ و بزاڤا رزگاریخازیا گەلێ كورد،پشتی چەندین شەڕ و تومار كرنا چەند داستانێت جوامێری و مێرانی،شێخ ئەحمەدێ بارزانی و مالباتێت بارزانیان ڤەگەریانەڤ كوردستانا عێراقێ و مستەفا بارزانی ژی دگەل زێدەتر ل(500)كەسان ڕێیا سوڤیەتێ گرتە بەر و داستانا پرقارەمانەتی و مێژوییا ڕێرەوا سوڤیەتێ تومار كر،شێخ ئەحمەد و خێزانێت بارزانیان ل دیانا دناڤ ئوردوگایەكێ ب تیڵە دەور دایی ڕاگرتن و سوپا و پولیسان زور ب توندی دور پێچ كربوون و رێ نەددا كەس بێ پرسیارا حكومەتێ بچیتە نك وان یان كەسێ وان بهێتە دەرێ،دیارە حكومەتا عێراقێ دبن چاقدێری و داگیریا ئینگلێزان شول دكر و ب تنێ كارتون بوون و هەرچیا ئینگلێزان ڤیابا ئەو دكر،بارزانی پشتی چونا خو بو كوردستانا ئیرانێ و پشكداری كرن و بەرگریكرن ل كومارا كوردستانێ و هەر وەتوڤ پەنا برنە بەر ئێكەتیا سوڤیەتێ،ببونە جهێ تووڕە بوونا ئینگلێزان و ئەوان ئەڤ شولە ب تاوانێت خراپ و نەبەخشرایی دادنان و حكومەتا عێراقێ هاندا كو هەرچییا كو ل دەست دهێت بەرامبەری بارزانییان بكەت.

لسەر ڤێ چەندێ شێخ ئەحمەدێ بارزانی و برایێت وی و كۆڕ و برازایێت وی ڤەگواستن بو زیندانا بەسرایێ و بڕیارا دادگەها عۆرفی پ وان ڕاگاهاند كو سالا(1945)ێ دەرچو بوو سەبارەت ب سێدارە دانا وان،هەر وەتوڤ هەمی نێرینە ل هەژدە سالی پێهەل برنە زیندانێت موسل و كەركووك،خێزانا شێخ ئەحمەد و خزمێت ویش دویر كرن بو كەربەلا و خێزانێت بارزانیاش دابەش كرنە سەر پارێزگەهێت هەڤلێر و موسل و كەركووك،ژن ناچار بوون شول بكەن چونكی چ زەلام دناڤ واندا نەما بوون،شێخ ئەحمەد هەتا شوڕەشا 14ێ تەموزێ(1958)ێ ل زیندانێ مایەڤە،نوری سەعیدی باوەر پێكریەكێ خو هناردە نك شێخ ئەحمەدی ل زیندانێ كو ببێژیتێ نامەیەكا هیڤیێ بو وەسی عەبدول ئیلای بنڤیسیت و پەشێمانیا خو و دلسوزیێ بو تەخت و حكومەتا بەغدایێ تێدا دیار بكەت و بەلێنێش بدەت، ب ناڤێ خو و تەڤایا زەلامێت هوزا خو،د دلسوز بن و داخازێش بكەت لێبورینا گشتی بو وان دەربچیت،شێخ ئەحمەدی ئەڤ هەمی ب توندی ماندەل كرن و ئەمر كر: ئەز دزانم بڕیارا خنكاندنا من یا دەرچوی ئەز نوكە و هەمی گاڤا یێ بەرهەڤم بەرەڤ مرنێ بچم،ل هیچ كریارەكا خوش یێ پەشیمان نیمە، چونكی ئەڤە ئەركەكێ ئولی و نیشتمانی بوویە، چ جاران ئەز هەژێ خو نزانم داخازا لێبورینێ ل ئێكێ ب كرێ گرتیێ ئینگلێزان بكەم، ئەز داخازا لێبورینێ ل خودێ نەبیت ل كەس ناكەم. بەلێ شێخ ئەحمەد ل وان كەسان نەبوو كو ل مردنێ بترسیت ئەو تشتێ باوەڕی پێ هەبا ب هەڕەشان واز لێ نە د ئینا، ل ڕاستیدا ب ئاوایەكێ بەرێ خو د دا ژیانا دونیایێ، كو جهێ هەڵوێستێ سەر بڵندی و شانازیێە، دبێژن دەمێ نوری سەعیدی ئەڤ بەرسڤە گەهشتیێ گوت : كەواتە ببێژنێ بڵا دژورێدا بیت هەتا دوماهی ب ژیانا وێ دهێت، شێخ ئەحمەدیش ل بەرسڤا وێ قەسێ گوتبوو : ئەز دێ هند لێرە روونێم هەتا دوماهی ب نوری سعیدی د هێت.

زەڵامێت بارزانی پشتی كو زێدەتر ل هەشت ساڵا ل زیندانێت بەسڕا و موسڵ و بەغدایێ مانەڤە، هاتنە بەردان ساڵا 1950 ژبلی هندەكێت كو مەترسی لێ دكرن هەر هەمی هاتنە بەردان . ساڵا 1953ێ ڕێ هاتەدان ڤەگەڕێنەڤ دەڤەرابارزان بەلێ شێخ ئەحمەد و خزمێت وی هەتا ساڵا 1958ێ ڤەمان هەتا شوڕەشا 14ێ تەموزێ هنگی ڤەگەڕیانەڤ بارزان . خودانێ بارزان بەردەوام بوو ل ئیرشاد و رێنوینی كرنا خەڵكی بو ڕێیا ڕاستیێ و هەرگاڤ پاڵپشت و پشتەڤانەكێ ب هێز و ڕاستین بوو بو هەوڵ و بزاڤێت ئازادیخازی و رێنوینی كرن و شیرەتڤانیێ لدەمێت پێدڤیدا . ئەڤ ڕەوش بەردەوام بوو هەتا ساڵا 1969ێ، سەرباری نەسەقامگیری دپەیوەندیێت نێڤبەرا حوكومەتا عێڕاقێ و شوڕەشا ئەیلولێ دا كو ل ساڵا 1961ێ هاتەڤ دەستپێكرن و ببویە سەردەما رویدانا گەڵەك شەڕ و سەرهاتێت نەخوش وە جار جاریش گەڕێت دان و ستاندنان برێڤە دچوون لێ سەرڤگێڕیا حەكیمانەیا شێخ ئەحمەدێ بارزانی وە ئەو شێوازێ پەیوەندیان كو دناڤ بەرا خودانێ بارزان و مەلا مستەفا بارزانیدا هەبوون هەتا ڕادەیەكێ دكارین بێژین ببوونە ئەگەرێ هندێ كو ب لایێ كێمیڤە وەكی جارێت چوویی خەڵكێ دەڤەرابارزان توویشێ كوچبار بوونی بو دەرڤەی سنوران نەبیت .

سەروك بارزانی لبارا كوچبار بوونا شێخ ئەحمەدێ بارزانی، دپەڕتوكا خودا (بارزانی و بزاڤا ڕزگاریخازیا كورد) بەرگێ سێیێ پشكا ئێكێ (1961-1975) لاپەڕە 257 نڤیسییە كو : هەواڵا نەخوشیا مەزنێ مە گەیشتە بارزانی، ل 5ێ كانوونا دویێ ساڵا 1969ێ ئەمركر كو ب لەز بچم بو بارزان و بزانم كا نەخووشیا وی چەند یا مەترسیدارە،پشتی ڕێكرنەكا بەردەواما شەڤ و ڕوژان ب پێیا،بو روژا پاشتر گەیشتمە وێرێ،هەر كو من دیتی ئەز زور لێ ترسیام،من بروسكەیەك بو بابێ خو كر و تێدا بەحسێ خرابیا بارێ تەندروستیا مەزنێ مەكر و من نڤیسی كو ژیانا وی كەتیە ددەستێ خۆدێدا،بابێ من بەرسڤداڤە: ب تشتەكێ ڤەگواستنێ و ب ملا بینن بو گەلالەی داكو پنێرینە دەرڤە،بەلێ ئەڤە دتوانایا دا نەبوو،پێش من دكتور حكیمەت بو سەر پەرشتیكرنێ گەیشتبوویە بارزان،دوكتور حكیمەت كو بو چاڤدانێ بەری من گەیشتبوویە بارزان گوتەمن: تڤیا ب زووترین دەم بگەییتە نەخوشخانێ،چونكی دەزگا و ئامێرێت پزیشكی هەر ل وێرێ یێت هەی،هەر دوو گوچیلكێت ڕاوەستای و ژیانا وی دمەترسیێ دایە،بارزانی دەرفەت داكو داخازا هلیكوپتەرەكێ ژ رژێمێ بكەین پێ ڤەگویزینە بەغدایێ، بڕێڤەبەرێ ناحیا بارزان بروسكەیەك بو ژێدەرێت بەرپرسیار لێدا،بو روژا پاشتر هلیكوپتەرەك هات و ئەڤ دختورە ئینا بوون:د.رافید.سوبحی،د.مهدی مورتەزا،د.شەوكەت دەهان،پشتی پشكنینێ، بڕیار دا كو ئێك و پل ببەن بو بەغدا،روژا(9)ێ چریا دویێ بر بو بەغدایێ و ل نەخوشخانا ئیبن سینا نڤاند،دەم ژمێر 4 ێ بەر سپێدێ(11)ێ چریا دویێ سالا(1969)ێ،مەزنێ مە كو(محەمەد خالد)كۆرێ وی و سەلیم یوسف ل نك بوون،مالئاڤایی ل ڤێ دنیایێ كر،ب ڤێ چەندێ و دروژكا وەكی ئەڤرودا بەرگێ ڕەش و شینی دبەر بەژنا چیایێت سەر بلندێت دەڤەرا بارزان و خەلكێ خو ڕاگرێ ڤێ دەڤەرێ و تەڤایا دەروێش و مریدێت ڤ زاتێ مەزن كرن،بەرز و بلند بیت یادا ڕێبەرێ روحی و پیشەوایێ روحانی شێخ ئەحمەدێ بارزانی.

Share this post