ئەلمانیا/ جڤینەك گرنگ ژبو ئانین سەر هەڤبوونا هێزێن دەموكراتیك ژ ئوپوزسیونا سوریا ب تەڤ ئالی و پێكهاتەڤە هات لدارخستن

د روژا 2012/2/18 دەمژمێر یەكێ پشتی نیڤرو، جڤینەك تایبەت لسەر رەوشا سوریا ب گشتی و كوردان ل سوریا ب تایبەتی هات لدارخستن . د دەمەك كو رەوشا شورەشا سوریا و گەلێ سوری (كورد، عەرەب، سریان، دورزی، ئیسماعیلی و ...... هتد ) خوە د قوناغەك زور تایبەت و دژوار و د هەمان دەمدا تەڤگەرا كورد و عەرەب ژی د چارچوڤا ئەنجومەنا نیشتمانیا سوریا و ئەنجومەنا نیشتمانیا كوردی دا، سەری كو گاڤەك گرنگ د ڕێچكا یەكبوون و نزیكبونا ئوپۆزسیونا كوردی ل ئالیەكێ و ئۆپۆزسیونا عەرەبی ل ئالیەكێ دن ئاڤێتیە، لێ مخابن ئەڤ گاڤە كو چ د ئەنجومەنا سوری دا، ئو چ د ئەنجومەنا كوردی دا، هاتیە ئاڤێتن، نەكارییە بەدەنا خوە ژبۆ تەڤاهیا ئۆپوزسیونا گشتی ڤەكەت ! هەتا نها زێدەتری (50 %) ژ ئۆپوزسیونا عەرەبی و كوردی ل دەرڤەی هەر دوو ئەنجومەنێن كو مە ل ژوور ئانین زمان، ماینە ! ژ بۆی مەرەما دان سەر هەڤ بوونا ئۆپوزسیونا كوردی یا دەرڤەی ئەنجومەنا كوردی مەجڤینەك بەرفرەه لدار خست. جڤین ب چەند شروڤێن سیاسی و ئەكادیمی لسەر رەوشا كورد و سوریا دەست پێكر .

دەستپێكێ بەرێز ماموستا (صلاح بدرالدین) ب پەتی و زەلالی شروڤەك سیاسی بەرفرە ه لسەر رەوشا شورەشا سوریا و گەلێ كورد ل سوریایێ پێشكەشی مێهڤانێن جڤینێ كر .

بەرێز ماموستا( صلاح بدرالدین) بال كشاند لسەر سیاسەتا هەرێمی و ناڤدەولەتی و د هەمان دەمێدا بال كشاندە سەر پرسا بەرفرە هكرن و ئانین سەر هەڤبوونا هێزێن دەموكراتیك ژ ئوپوزسیونا كوردی، عەرەبی، سریانی، دورزی، ئیسماعیلی و ......... هتد، و بانگا وی ئەڤ بوو كو ئاریكارییا هێزێن یەكبوونا دەموكراتیك ل تەڤاهیا سوریا و هەرێما كوردستانا روژ ئاڤا ببیت ! ل پشكەكا دن یا ئاخڤینا خوە دا، رێزداری جارەك دن ستراتیژییا هەڕ فاندنا رژێما (ئەسەد) دووبارە كر و پشت راست كر، هەروەها خوەزاییا پولیتیكا عەرەبی و ناڤدەولەتی یا ل دژی مافێن چارەنڤیسێ گەلێ كورد ل سوریا ب بەلگە و راستی و ریئالیتە ئانی زمان و گوتنا خوە ب داوی كر .دویڤ رە ماموستا، دكتۆر (هەڤال سلێمان میرو) د چارچوڤێ شروڤەك سیاسی و ئەكادیمی كۆرت دا، بابەتەك پیشكەش كر و شروڤە كر كو گرنگە هەموو پارتی، تەڤگەر، ناڤەندێن هەماهەنگیێ (تەنسیقیات )، كەسایەتی و هەموو رولەپەرێن كورد و سوری یێن كو هن ل دەرڤەیی َ هەردوو ئەنجومەنانە، دڤێت خوە بدن لسەر هەڤ ئانكو ئەڤ قوناغا شورەشا سوری و گەلێ كورد تێڕا دەرباز دبت ژ ئۆپوزسیونا كوردی و سوری دخوازیت كو جۆدا ئو ب تەنا خوە، چ ل وەلات و چ ل دەرڤەی وەلات ب سەر خوە نەگەڕێن ! ئانكو دڤێت تەڤاهیا ئۆپوزسیونا كوردی، چ د ئەنجومەنا كوردی دا و چ دەرڤەی ئەنجومەنا كوردی دە، د جڤینەك بەرفرە دە، ل هەڤ بجڤن و یەكێتیا گشتی ئاڤەدان بكن و ب خۆرتی پشتگیرییا هێزێن یەكێتیا دەموكرات چ ل سوریێ و چ ل هەرێما كوردستانا سوریێ بكن . هەروەها سیاسەتمەدارێن كورد، دكتۆر (تەوفیق حەمدوش) د موداخەلەك ئاشكرا دە پشتگیرییا خوە بۆ شورەشا سوریا و یەكێتییا گشتی ب داوی كر .

وەك پشتگیری ژ بۆ ئارمانجێن ڤێ جڤینێ دكتۆر (ئیبراهیم )، دكتور (ئەحمەد رەشید )، دكتور ( جەمشید عەبدولكەریم )، ماموستا (عەبدولباری رەشید )، ماموستا (خالید حەسۆ )، ماموستا (خواد جەمۆ )، ماموستا (ئیبراهیم خەلەف ) و ...... هتد، پشتگیریا خوە ژبۆ گۆڕ كرنا شورەشا سوریێ و ئانین بەرهەڤبوونا تەڤاهیا هێزێن د ژبەرێن كوردی د جڤینەك بەرفرە دە پشت راست كرن . د داویێ دە بڕیارا ئامادەكرنا جڤینەك بەرفرەه ژبۆ تەڤاهیا دژبەرێن (مۆخالەفا ) كورد ل ئەوروپا هات ستاندن .

هانونا محەمەد

دەزگەهێ ئەلمانی- كوردی هارمان بو لێكولین و دەموكراسیێ / بەرپرسیارا تێكهەلیێن كارێ دەرڤە