|
حكمهت خابوور
|
|
دووشەممە, 23 کانونی دووەم 2012 16:43 |
|
خهبات پێخهمهت ئازاديێ بهردهوامه ل ههموو دهڤهرێن كوردستانێ، ئهڤچهنده ژى پشتڕاستييا دورهێلا مانديبوونا دوور و درێژييا گهلێ كورد ئاشكرا دكهت، ئهو گهلێ بۆ دهمهكێ زور درێژ چهندين قورباني داين، داكو ڤێ ئازاديێ بدهستخوهڤه بينيت، درووشمێ گهلێ كورد ل ههرچوار پارچهيێن كوردستانێ، ئازادي و ديمۆكراتي بۆ وان وهلاتێن گهلێ كورد لێ دژين و مافێ چارهنڤيسى بۆ گهلێ كورد، لێ ئهڤروۆ ئهڤ درووشمه بوويه داخوازييهكا ههڤپشك بۆ ههموو گهلێن ڤێ دهڤهرێ.
رۆژ بۆ رۆژێ گرنگييا جيوسياسي و جيوستراتيجي و ديمۆگرافي و ئابووري بهرهڤ پێشڤه دچيت ل رۆژههلاتا ناڤهراست، كوردستان ناڤهند و دلێ ڤێ دهڤهرێيه و كورد ژ وان گهلێن سهرهكيينه ل ڤێ دهڤهرێ، ههر وهكو (ترك، ئهرهب، فرس، كورد) و ژ لايهنێن مێژوويي و رهوشهنبيريڤه پشكدارن دگهل ئێك و ل دهڤهرێ پێكڤه گرێداينه بهري چهندين چاخان، پهيوهنديێن كۆمهلايهتي و رهوشهنبيري و ئابووري د ناڤبهرا ڤان گهلاندا ل كوردستانێدا دهربازدبن، ههرديسا ل كوردستانێ د گههنهڤه ئێك.
بڕياردان ب مافێن رهوايێن گهلێ كورد دێ بيته جهێ پهيدابوونا ئاراميێ بۆ كوردستانێ و ئهڤه د بهرژهوهندييا ههموو گهلێن رۆژههلاتا ناڤيندايه، لێ پێشيلكرنا مافێ گهلێ كورد و ژناڤبرنا ناسنامهيا وي، دێ بيته ئهگهرێ نهئارامييا ههموو دهڤهرێ.
سروشتێ كێشهيا گهلێ كورد و سهربوڕا وييا سياسي و پشتگۆهـ هاڤێتنا مافێن وي بوويه ئاستهنگ و رێگر بۆ بهربهلاڤبوونا ئازاديێ و ئێمناهيێ ل دهڤهرێ، ئهو سياسهتێن گهلێ كورد تووشي كوشتن و ژناڤبرنێ كرين و ههموو رێكێن دژي ڤي گهلي دگهل هاتينه بكارئينان، ههر وهكو (كوشتنا بكۆم ل دێرسمێ و حهلهبچه و ههوێن ئهنفالان و چهندين جورێن دي يێن كوشتنێن بكۆم).
ڤێ سياسهتێ چو باشي بۆ گهلێن دهڤهرێ بدهستڤه نهئينايه، لێ بهروڤاژي باشيێ، ئهڤ سياسهته بوويه ئهگهرێ بهردهوامبوونا دژايهتيێ و نهڤييانێ و شهڕي د ناڤبهرا گهلێن دهڤهرێدا.
ئهگهر ههر كهسهك هزركرنهكا باش بكهت ل چارهكرنا دوزا گهلێ كورد ل دهڤهرێ، دوور ژ نهڤيانێ و دژمنكاريێ، دێ بۆ ئاشكرا بيت كو هندي ئهڤ دوزه چارهنهبيت، ئهڤ دهڤهره دێ ههر د مهترسيێدا بيت، لێ بهروڤاژي ئهگهر چارهيهك بهێته ديتن بۆ ڤێ كێشهيێ، دێ بيته بنوكهيێ ئێمناهيێ و پێشكهڤتنێ، خوه ئهگهر وهلاتهكێ كوردي ژي بهێته دامهزراندن، دێ بيته وهلاتهكێ دوست و هاريكار بۆ ههموو وهلاتێن دهڤهرێ، لێ د ڤي بياڤيدا، دڤێت وێ چهندێ ئاشكرا بكهين كو گهلێ كورد حهزا جودابوونێ نينه.
چارهسهرييا كێشهيا گهلێ كورد ل ئێراقێ هاتييهكرن د چوارچووڤهيێ ئێراقهكا فيدرالييا ئێكگرتيدا، ئهرێ گهلۆ ههبوونا ههرێما كوردستانێ چ مهترسي ل دهڤهرێ ههيه؟ يانژي چ مهترسي ههيه لسهر گهلێ ئيراقێ؟ فيدرالييهتا كوردستانا ئيراقێ بوويه ئهگهرێ بدهستڤهئينانا ئاراميێ ل دهڤهرێ، رۆلێ سهرۆكێ ههرێما كوردستانێ ژي بهرێز (مسعود بارزاني) بۆ بهلاڤكرنا ئێمناهيێ و ئێكگرتنا ئێراقێ جهێ رێزلێنانێيه ژ لايێ ههموو گهلێ ئێراقێ و گهلێن دهڤهرێ.
ههرديسا، تركيێ زور پێشكهڤتييه ژ لايێ سياسي و ئابووري و بازرگاني تهكنولۆجيڤه زوورتر ژ ههموو وهلاتێن رۆژههلاتا ناڤهراست، ئهگهر تركيێ حهز بكهت ههر يا پێشكهڤتي بيت و رۆلهكێ مهزن ل دهڤهرێ ههبيت و خوه بگههينيته وهلاتێن پێشكهڤتي، دێ پێدڤي ب تهناهيێ بيت، لهوا ئهڤ ههردو نموونهيه جێبهجێ نابن ل تركيێ ئهگهر ئهو دانپێدانێ ب مافێن رهوايێن گهلێ كورد د دهستوورهكێ نوودا نهكهت، نهخاسمه بـ: (ناسنامه، مافێن سياسي، رهوشهنبيري، كۆمهلايهتي).
زور گرنگه چارهيهكا ديمۆكراتي بۆ كێشهيا گهلێ كورد ل رۆژههلاتا ناڤين بهێته ديتن، ب تايبهتي ل تركيێ، چنكو كوردستان دهڤهرهكا زور گرنگه ل رۆژههلاتا ناڤين و گهلهك رێكێن بازرگانيي يێن تركيێ د ناڤا كوردستانێدا دهربازدبن بۆ ئێراقێ و وهلاتێن ئهرهبي، لهوا لڤێرێ پێدڤييه ئاماژهيێ ب خالهكا گرنگ بدهين، ل دهمێ بهراوردييهكێ بكهين ل تايبهتمهنديێن جيوگرافي و مێژوويي و ئاييني يێن گهلێن نێزيكي سنوورێن تركيێ، دێ بۆ مه ئاشكرابيت كو گهلێ كورد زور خالێن ههڤپشك ههنه دگهل گهلێ تركيێ و زورتر ژ گهلێن دي يێن دهڤهرێ، ههرديسا ژ لايهكێ ديڤه، ب تنێ گهلێ كورد وهلاتێ تركيێ ب جيهانا ئيسلاميڤه گرێددهت، لهوا ل دهمێ نها، تركيێ نهشێت رۆلهكێ گرنگ ل دهڤهرێ بگێڕيت بێي گهلێ كورد، ژبهر ڤێ چهندێ، پێدڤييه تركيێ لێزڤڕينهكێ ل سياسهتا خوه بكهت سهبارهت گهلێ كورد و وان رازي بكهت.
پهيوهنديێن باش و ئهرێني د ناڤبهرا ههرێما كوردستانێ و تركيێدا، وێ چهندێ ئاشكرا دكهن كو ههردو مفايي ژ ههڤدو وهردگرن، كليلكا پهيوهنديێن ئاشتييانه و بهێز و جهگيربوونێ ژي د دهستێن تركيێ دايه. لايهنێ كوردي د مێژووێيدا راستييا پهيوهنديێن خوه دوپاتكرييه و ئهڤ تهناهييه دێ بيته جهێ دلرهحهتييا ههموو گهلێن ڤێ دهڤهرێ و د بهرژهوهندييا ههموو لايهكي دايه، ديسا ئهگهرهكێ گرنگه بۆ تركيێ داكو ببيته ئهندام د ئێكهتييا ئهورۆپيدا.
|
