كاك كەریم یەحیا: فیدراسیون د هەر بوارەكێدا كو پەیوەندی ب كوردانڤە هەبیت كار دكەت مینا: كولتوری، كەلەپوری، گەنج و لاوان، ئافرەت و زاروك و گیروگرفتێت پەنابەران و ...هتد.

فیدراسیونا كومەلێت كوردی ل سوید، پێخەمەت خزمەتكرنا وارێت كەلتوری و كەلەپورێ كوردی و پرسێت پەنابەران و روینشتڤانێت كورد ل سویدێ هاتیە دامەزراندن و تەڤایا كومەلێت مەدەنی بخوڤە دگریت كو نێزیكی 50 كومەلان ئەندامن تێدا. بو زێدەتر ناسینا ئەڤێ سازیا گرنگ و چەوانیا برێڤەچونا كاروبارێت وان و بەرنامە و پلان و پروگرامێ وان، مە بفەر زانی كو هەڤدیتنەكێ دگەل بەرێزان: كەریم یەحیا و سعود شێخ میرزا، دوو ئەندامێت چالاكێت ڤێ فیدراسیونێ بكەین كو ئەڤە دەقێ وێ هەڤدیتنێ یە:

- بەرێز كەریم یەحیا،دێ شێی پێناسەكا ڤێ فیدراسیونێ بكەی؟

كەریم یەحیا: فیدراسیونا مە ل سالا 1984 ل ستوكولمێ هاتیە دامەزراندن و پێكدهێت ژ وان كومەلێت كوردی یێت سەرتاسەری باژارێت سویدێ كو كۆمەڵە پەنابەرەكان دامەزراندینە ومۆڵەتا یاسایی ل حكومەتا سویدی وەرگرتینە بۆ خزمەتا (كلتۆر وكەلەپەر و پرسێت خۆ ) و ئەو كۆمەڵە دبنە ئەندام و ڤێ فیدراسیۆنێ دا.

- ڤێ گاڤێ چەند كومەلە ئەندامن د فیدراسیونا هنگودا؟

كەریم یەحیا: ڤێ گاڤێ نێزیكی 50 كومەلە ئەندامن تێدا و بیگومان بو چێبوینا هەر كومەلەكێ فیدراسیونا مە هاریكاریا وان دكەت.

- كی رێڤەبەرە د ڤێ فیدراسیونێ دا؟

كەریم یەحیا: ڤێ گاڤێ ئافرەتەكا ژێهاتی رێڤەبەرە، ئەو ژی خاتوو (شرمین بوز ئەرسەلان )ە.

- ئایا ل هەر باژێرەكێ ئێك كومەلە هەیە یان ل گور رێژەیا پەنابەرانە؟

كەریم یەحیا: دڤێت هژمارا ئەندامێت هەر كومەلەكێ ژ 25 ئەندامان كێمتر نەبن و چەندی كومەلە هەبن درستە.

- سعود شیخ میرزا، ئایا ل هەر كومەلەكێ دڤێت كوردێت چەند پارچێت كوردستانێ تێدا بن بو نمونە دوو پارچا، سێ پارچا ......... هتد؟

سعود شیخ میرزا : هیچ جیاوازییەك نییە ئێك پارچە بیت یان سێ و چار.

رێزدار كەریم یەحیا، فیدراسیۆن ل چ بوارەكێدا كار دكەت؟

كەریم یەحیا: د هەربوارەكێدا كو پەیوەندی ب كوردانڤە هەبیت بێ جوداهی ل هەر پارچەكا ولاتی بو نموونە، بوارێ (كلتوری، كەلەپور، گەنج، ئافرەت، گیروگرفتێت كوردان دگەل وی خەلكێ دگەل دژین، ناساندنا گەلێ كورد ........... هتد).

- رێزدار سعود شێخ میرزا، ئەگەر ئاریشەك ل ئێك ل پارچێت ولاتی چێببیت دێ هنگو ژی هەلوێست هەبیت و چەوا؟

سعود شێخ میرزا: بێگومان هەر بویەرەك یان ئاریشەك یان ئالوزیەك ل هەر پارچەیەكا كوردستانێ چێ ببیت دەم ل دەست تەڤایا ئەندامان دهێتە هایدار كرن و كوبونەوە دهێتە كرن و هەلوێست دهێتە وەرگرتن، بو نموونە چ وەكی خو پیشاندان یان هەر كارەكێ دی، بێگومان لێرە خو پیشاندان ب مولەت وەرگرتن دهێتە كرن ب شێوەیەكێ ئاشتی.

- رێزدار كەریم یەحیا، ئایا هنگو هەڤبەندی هەنە و لسەر چ بنەمایەكێنە دگەل كومەلە و رێكخراوێت كوردستانا باشور، دێ شێن بگەنە ئێرە و دەمەكی لێرە بمینیت و مفایێ ل ئەزمونێت هنگو وەربگریت و دیسان هنگ ژی بچنە وێرێ؟

كەریم یەحیا: بەلێ د شێین و گەلەك جاران ژی تشتێ وەسا چێ بویە بو نموونە پروژەیا قەندیلێ و هەروەسا د وارێ پەروەردەكرنا زاروكاندا.

- ل دویماهیكێدا تە پەیڤەك هەیە كاك سعود؟

سعود شێخ میرزا: گەلەك سوپاس بو هنگو و ئەم دشێین كوهاریكاریا زاروكان بكەین بو زمانێ دایكێ.

- كاك كەریم، پەیڤا دوایێ؟

كەریم یەحیا: گەلەك سوپاس هیڤی دارین نمونێت وەك هنگو د زوربن.

Share this post